Oscar Pistorius afungwa jela miaka sita

Mwanariadha Oscar Pistorius akiondolewa mahakamani

Na Mwandishi Wetu.

Bingwa wa mbio za Olimpiki za walemavu Oscar Pistorius, kutoka Afrika Kusini, amehukumiwa kufungwa jela miaka sita kwa kumuua mpenzi wake mwaka 2013.

Pistorius alikuwa amekabiliwa na uwezekano wa kufungwa jela zaidi ya miaka 15.

Mawakili wa upande wa mashtaka na wa upande wa mshtakiwa wanaweza kukata rufaa ya kupinga matokeo ya hukumu hiyo kama hawatokubaliana nayo.

Uamuzi wa mahakama nchini umetolewa baada ya kubatilishwa kwa hukumu ya awali ya kumuua bila kukusudia aliyekuwa mpenzi wake mwezi Desemba baada ya upande wa mashtaka kukata rufaa ya kutoridhishwa na hukumu hiyo.

Pistorius mwenye miaka 29, alimpiga risasi  mara nne Reeva Steenkamp ambaye alikuwa mpenzi wake February 2013.

Pistorius amepelekwa jela ya Khosi Mampuru mjini Pretoria kwa ajili ya kuanza kutumikia adhabu hiyo huku akisubiri mawakili wake wa upande wa utetezi kwenda kukata rufaa itakayomuwezesha kutoka nje ya gereza hilo.