Wadau wajitokeza kupinga Rushwa ya Ngono kazini, Vyuoni

Chuo cha Dar Es Salaam

Na Mwandishi Wetu

WALIMU ,wanafunzi  na wafanyakazi wa Taasisi za elimu ya juu nchini wameungana kwa pamoja kulaani vitendo vya utoaji  na uombaji wa rushwa ya ngono vyuoni ,sehemu za kazi na katika jamii.

Tamko hilo lilitolewa mwishoni mwa  wiki na Mwenyekiti  wa umoja wa kupambana na rushwa ya ngono ambaye pia ni mhadhiri wa Chuo Kikuu cha Dar es Salaam(UDSM)Colman Msoka baada ya kumaliza mafunzo juu ya kupinga vitendo vya rushwa ya ngono vyuoni.

Alisema kuwa rushwa ya ngono vyuoni na sehemu za kazi ni tatizo kubwa hapa nchini ikiwa ni pamoja na nyumbani shuleni hata kwenye mikusanyiko mbalimbali ya mikutano ya dini na ya kisiasa.

Pia  vitendo vya  rushwa ya ngono vyuoni hutokea baina ya wanafunzi na walimu au wanafunzi kwa wanafunzi na  waajiri katika sehemu ya kazi.

"Baada ya kupata mafunzo juu ya kupinga  vitendo vya rushwa ya ngono  katika taasisi ya elimu ya juu yaliyotolewa na taasisi ya  mafunzo ya mafunzo ya jinsia(GTI) kwa kushirikiana na Women Fund Tanzania, tunalaani  vikali  vitendo vya utoaji ngono na uombaji wa rushwa ya ngono vyuoni na katika jamii,"alisema Msoka.

Aliongeza  kuwa vitendo hivyo vimekuwa sii vya kibinadamu vimekuwa vinadhalilisha, kunyanyasa na kuondoa ubindamu na tahamani ya utu wake na  huchangia kwa kiwango kikubwa kuathirika kisaikolojia.

Pia alisema rushwa ya ngono  imekuwa ikisababisha magonjwa, vifo, mifarakano, kulipiza visasi, watumishi hewa, wataalamu wabovu, utendaji kazi duni, nidhamu  mbovu miongoni mwa waajiri, wanafunzi  na makundi mengine ya watu wanaojihusisha na suala la kuomba na  kutoa rushwa ya ngono ili kufanikisha azma zao.

"Kushamiri kwa vitendo  hivyo vya rushwa ya ngono kunatokana na imani iliyopo kwa baadhi  ya wanawake na wanaume kuwa mafanikio yao yatapatikana  kwa urahisi zaidi kwa kutoa rushwa ya ngono,"alisema Msoka.

Alitoa rai kwa viongozi  wote wa  taasisi za elimu ya juu hapa nchini kuunga mkono juhudi za kuhakikisha tunamaliza tatizxo hili la uombaji na utoaji rushwa ya ngono  vyuoni na sehemu za kazi.

Aliwataka watanzania  na jamii ya wapenda haki na wanaopinga vitendo vya udhalilishaji na unyanyasaji mtaunga mkono juhudi  hizi za  kupinga  rushwa ya ngono vyuoni na sehemu nyingine katika ngazi ya familia  hadi taifa.

Hata hivyo wamevitaka vyombo vya habari kushiriki katika mapambano haya kwa kuandika na kutangaza matukio ya rushwa ya ngono yanayojitokeza kwa jamii ili kuongeza nguvu na kupata sauti ya pamoja itakayoimarisha ya kulaani vitendo hivyo.