Makocha Wanne kutoka nchi nne wajitosa kuifundisha Simba

Makamu Mwenyekiti wa Klabu ya Simba, Geofrey Nyange ‘Kaburu’

Na Francis Michael
Makamu Mwenyekiti wa Klabu ya Simba, Geofrey Nyange ‘Kaburu’, alisema jana kuwa kitu cha kwanza wanachokusudia kukifanya ni kuleta kocha Mzungu mwenye rekodi ya kimataifa, ambaye atawasaidia kuwaongoza kuchagua wachezaji wa kusajili ili kuwa na kikosi imara.

“Bado tunaendelea na mchakato wa kusaka kocha, tayari tuna maombi kutoka kwa makocho wa nchi nane tofauti. “Wapo wawili ambao tumevutiwa nao na tunatarajia kufanya nao mazungumzo ili kuona yupi tumchukue,” alisema Kaburu.

Alisema kwa sasa hawezi kutaja nchi wanazotoka makocha hao, lakini kilichowavutia ni ubora wa wasifu wao na kulifahamu vizuri soka la Afrika hasa ukanda wa Afrika Mashariki na Kati.

Aliendelea kuwa mbali ya kuwahi kufanya kazi kwa muda mrefu Afrika, lakini pia wanayajua vizuri mazingira ya kazi na maisha ya wachezaji wenyewe, hivyo itakuwa rahisi kwao kuijenga timu yao naili ifanye vizuri.

“Shida yetu kubwa ni kuiona Simba ikifanya vizuri kwenye ligi na kumaliza uteja wa kufungwa na Yanga kama ilivyokuwa msimu uliopita, ndiyo maana tukaamua kutafuta kocha mwenye kulijua vizuri soka la Afrika Mashariki na wachezaji wenyewe na tunafurahi mazungumzo yanaenda vizuri,” alisema Kaburu.